ಸುರಂಗದೊಳಗಿನ ಭೀಕರ ಕತ್ತಲ ಕೂಪದಿಂದ ಕಾರ್ಮಿಕರನ್ನು ರಕ್ಷಿಸಿದ್ದೇ ರೋಚಕ

ಉತ್ತರಕಾಶಿ ನವೆಂಬರ್ 28: ಉತ್ತರಾಖಂಡದ (Uttarakhand tunnel) ಸಿಲ್ಕ್ಯಾರಾ ಸುರಂಗದಲ್ಲಿ ಸಿಲುಕಿದ್ದ 41 ಕಾರ್ಮಿಕರಿಗಾಗಿ 17 ದಿನಗಳ ಸುದೀರ್ಘ ಕಾಯುವಿಕೆ ಮಂಗಳವಾರ ಕೊನೆಗೊಂಡಿತು. 41 ಕಾರ್ಮಿಕರಲ್ಲಿ ಮೊದಲನೆ ತಂಡ ಅಂದರೆ 12 ಕಾರ್ಮಿಕರನ್ನು ರಕ್ಷಕರು ಸಂಜೆ 7:56 ಕ್ಕೆ ಸುರಂಗದಿಂದ ಹೊರಗೆ ತಂದಿದ್ದಾರೆ. ಇದೀಗ 41 ಕಾರ್ಮಿಕರನ್ನು ಸುರಂಗದಿಂದ (Tunnel) ಹೊರತೆಗೆಯಲಾಗಿದೆ. ದೆಹಲಿಯ ರ‍್ಯಾಟ್ ಮೈನರ್ (rat miner) ಮುನ್ನಾ ಖುರೇಷಿ ಅವರು ಮೊದಲು ಇನ್ನೊಂದು ಕಡೆಗೆ ತಲುಪಿದ ವ್ಯಕ್ತಿ.

ನಾನು ಕೊನೆಯ ಬಂಡೆಯನ್ನು ತೆಗೆದಿದ್ದೇನೆ. ನಾನು ಅವರನ್ನು ನೋಡಬಹುದಿತ್ತು. ನಂತರ ನಾನು ಇನ್ನೊಂದು ಬದಿಗೆ ಹೋದೆ. ನನಗೆ ಸಾಧ್ಯವಾಗಲಿಲ್ಲ,ಆದರೆ ಅವರು ನಮ್ಮನ್ನು ಬಂದು  ತಬ್ಬಿಕೊಂಡರು. ನಮ್ಮನ್ನು ಹೊರಗೆ ಕರೆದೊಯ್ದಿದ್ದಕ್ಕಾಗಿ ಧನ್ಯವಾದಗಳು ಎಂದು ಹೇಳಿದರು. ಕಳೆದ 24 ಗಂಟೆಗಳಲ್ಲಿ ನಾವು ನಿರಂತರವಾಗಿ ಕೆಲಸ ಮಾಡಿದ್ದೇವೆ. ನನ್ನ ಸಂತೋಷವನ್ನು ವ್ಯಕ್ತಪಡಿಸಲು ಸಾಧ್ಯವಿಲ್ಲ. ನನ್ನ ದೇಶಕ್ಕಾಗಿ ನಾನು ಅದನ್ನು ಮಾಡಿದ್ದೇನೆ. “ಅವರು (ಸಿಕ್ಕಿ ಬಿದ್ದ ಕಾರ್ಮಿಕರು) ನಮಗೆ ನೀಡಿದ ಗೌರವ, ನನ್ನ ಇಡೀ ಜೀವನವನ್ನು ನಾನು ಮರೆಯಲು ಸಾಧ್ಯವಿಲ್ಲ” ಎಂದು ಹಿಂದೂಸ್ತಾನ್ ಟೈಮ್ಸ್ ಜತೆ ಮಾತನಾಡಿದ ಖುರೇಷಿ ಹೇಳಿದ್ದಾರೆ.

ಮೊದಲ ಸ್ಥಳಾಂತರಿಸುವ ಮೊದಲು, ಎಸ್‌ಡಿಆರ್‌ಎಫ್ ಮತ್ತು ಎನ್‌ಡಿಆರ್‌ಎಫ್‌ನ ಸಿಬ್ಬಂದಿ ಸ್ಟ್ರೆಚರ್‌ಗಳೊಂದಿಗೆ ಸುರಂಗವನ್ನು ಪ್ರವೇಶಿಸಿದ್ದರು. ಕಾರ್ಮಿಕರನ್ನು ಸ್ವಾಗತಿಸಲು ಉತ್ತರಾಖಂಡ ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಮತ್ತು ಕೇಂದ್ರ ಸಚಿವ ವಿಕೆ ಸಿಂಗ್ ಉಪಸ್ಥಿತರಿದ್ದರು.

ಸುರಂಗದಿಂದ ಸಿಕ್ಕಿಬಿದ್ದ ಕಾರ್ಮಿಕರನ್ನು ರಕ್ಷಿಸುತ್ತಿದ್ದಂತೆ ಸ್ಥಳೀಯರು ಸಿಲ್ಕ್ಯಾರಾ ಸುರಂಗದ ಹೊರಗೆ ಸಿಹಿ ಹಂಚಿ ಸಂಭ್ರಮಾಚರಣೆ ನಡೆಸಿದರು. ಸುರಂಗದ ಒಂದು ಭಾಗವು ನವೆಂಬರ್ 12 ರಂದು ಕುಸಿದಿದೆ, ಸುರಂಗದ ಸಿಲ್ಕ್ಯಾರಾ ಭಾಗದಲ್ಲಿ 60 ಮೀಟರ್ ವಿಸ್ತಾರದಲ್ಲಿ ಅವಶೇಷಗಳು ಬೀಳುತ್ತಿತ್ತು, ಇದರಿಂದಾಗಿ 41 ಕಾರ್ಮಿಕರು ನಿರ್ಮಾಣ ಹಂತದಲ್ಲಿರುವ ಸುರಂಗದೊಳಗೆ ಸಿಕ್ಕಿಹಾಕಿಕೊಂಡರು.

ಗಡ್ಕರಿ ಅಭಿನಂದನೆ

ಕೇಂದ್ರ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರು ಸಾಮಾಜಿಕ ಮಾಧ್ಯಮ ಎಕ್ಸ್ ನಲ್ಲಿ ರಕ್ಷಣಾ ಕಾರ್ಯಾಚರಣೆಯಲ್ಲಿ ತೊಡಗಿರುವ ಏಜೆನ್ಸಿಗಳಿಗೆ ಧನ್ಯವಾದ ತಿಳಿಸಿದ್ದಾರೆ.  “ಸಿಲ್ಕ್ಯಾರಾ ಸುರಂಗ ಕುಸಿತದಲ್ಲಿ ಸಿಕ್ಕಿಬಿದ್ದ 41 ಕಾರ್ಮಿಕರನ್ನು ಯಶಸ್ವಿಯಾಗಿ ರಕ್ಷಿಸಿರುವುದರಿಂದ ನನಗೆ ಸಂಪೂರ್ಣ ಸಮಾಧಾನ ಮತ್ತು ಸಂತೋಷವಾಗಿದೆ. ಇದು ಬಹು ಏಜೆನ್ಸಿಗಳ ಸುಸಂಘಟಿತ ಪ್ರಯತ್ನವಾಗಿದ್ದು, ಇತ್ತೀಚಿನ ವರ್ಷಗಳಲ್ಲಿ ಅತ್ಯಂತ ಮಹತ್ವದ ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಒಂದಾಗಿದೆ. ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದರೂ ವಿವಿಧ ಇಲಾಖೆಗಳು ಮತ್ತು ಏಜೆನ್ಸಿಗಳು ಪರಸ್ಪರ ಪೂರಕವಾಗಿವೆ. ಎಲ್ಲರ ದಣಿವರಿಯದ ಮತ್ತು ಪ್ರಾಮಾಣಿಕ ಪ್ರಯತ್ನಗಳು, ಎಲ್ಲರ ಪ್ರಾರ್ಥನೆಯೊಂದಿಗೆ ಸೇರಿಕೊಂಡು ಈ ಕಾರ್ಯಾಚರಣೆಯನ್ನು ಸಾಧ್ಯವಾಗಿಸಿದೆ. ರಕ್ಷಣಾ ತಂಡಗಳ ಸಮರ್ಪಿತ ಪ್ರಯತ್ನಗಳು ಅನುಕೂಲಕರ ಫಲಿತಾಂಶಗಳನ್ನು ನೀಡಿವೆ ಎಂದು ಅವರು ಹೇಳಿದರು.